LA CARRETO RAMADO


Èr : Lagadigadèu la Tarasco !


Vivo sant Aloi e sa Carreto !
Alestissen-nous, qu'es pèr deman :
Que touti li brido fugon neto,
E que li mirau fugon brihant !
Aguen un tambour que nous rampelle
Lagadigadèu pèr mies trouta,
E que lou fleitet se desbarbelle,
Lagadigadèu ! sens s'arresta.

Isso ! la Carreto es enramado
Emé d'óume verd, coume counvèn,
E veici la fèsto renoumado
Di fier meinagié que fan lou bèn.
Anen, Jan, garnisse ta Faleto,
léu vau arnesca moun bon Roubin :
Dóu tambour entende li bagueto,
Nous saren pas proun leva matin.

Eila sus lou Cous li fouit claquejon,
Coumençon li tra de s'estira,
Sus la tèsto li plumet flouquejon,
Lou mounde a grand gau de se gara :
Lagadigadèu ! la chasso peto,
Li carretié sauton d'assetoun...
Lagadigadèu ! cour la Carreto,
E chascun l'espèro en un cantoun.


La veici qu'arribo sus la Plaço,
óuti li gènt courron desgaja ;
Pèr la vèire e vèire mai quand passo,
Tout lou Jour se fai que póusseja.
Souto li cuberto bèn broudado
Soun requinquiha nósti mioulet :
En chasque coulas sa tourtihado,
En chasque coulas soun drapelet.

Mai li carretié tóuti se taison,
Tóuti porton à l'autar dóu sant
Uno candeleto, e 'm'acó baison
L'estolo dóu prèire óuficiant
Que vèn benesi pièi la Carreto
En presènço dóu grand Sant Aloi :
Dóu tèms di preiero lou fouit peto,
Mounton à chivau d'enfant galoi.

Emé la Carreto, dóu vilage
Pièi se fai lou tour en proucessioun ;
A noste patroun rendèn óumage
Emé la plus grando devoucioun...
La ceremounié tant lèu finido,
Se vai lou galop recoumença ;
Vesès dardaia li bèlli brido,
Entendes li fouit se deschassa.

le faren tasta la tourtihado,
Mai fau que li mióu bagnon lou peu,,
Lagadigadèu ! chasco tournado,
Se vai béure un cop vers li dous priéu.
Vaqui mai que lando la Carreto,
Leissas-la passa que filo bèn !
Emé lou tambour que fai si freto
Vous passo davans coume lou vent.


Mai à nósti fouit i'a plus de chasso,
Noste paure fifre perd alen ;
Li bèsti coumençon d'èstre lasso,
Dèvon se langui que destalen.
Lagadigadèu ! A la dinado
Anen tira tóuti noste escot,
E que sant Aloi, uno autro annado,
Toujour nous counserve coume acó !






JOUSÈ SOURBI



Maïano, juliet, 1872.